Угар Жәнібеков

Угар (Мұқатай) Жәнібеков

Угар 1887 жылы қазіргі Қарағанды облысы, Ақтоғай ауданы, Қызыларай кеңшарында кедей шаруаның отбасында дүниеге келген.

Бала кезінде 10 12 жасқа келген соң бай жалшылығында болып қой қозы баққан. 16 жастағы жас бала 1903 жылы саудамен жүрген татар саудагерлеріне еріп Петропавл (Қызылжар) Омбы қалаларына келеді. Онда өмірінің жаңа кезеңі басталып, жұмысқа орналасады. Саяси сауаты ашылып, таптық көзқарасы қалыптасады.

1905 жылғы революцияға қатысушы және жетекшілерінің бірі Василий Кузнецовтың қызы Натальяға үйленеді. Натальяның ағасы Андреймен бірге большевиктердің астыртын ұйымына қатысады, тапсырмаларды орындайды. 1912 жылы 4 апрель күні Шығыс Сібірдің сақылдаған аязында Лена кеніндегі 3 мыңнан астам жұмысшылардың ереуілі болды. Ереуілде солдаттар қару қолданып, бүкіл еңбекшілердің ыза кегін қайнатқан атақты Лена қанды қырғыны басталады. Угар Жәнібеков осы Лена оқиғасына қатысқан. Сонда патша жендеттерінің оғы тиіп жараланған, тұңғыш қазақ. Осы оқиғаға қатысқаны үшін патша соты 12 жылға айдауға жібереді. 1913 жылы шыққан «Қазақ» газетінде осы оқиға жақсы баяндалған. Октябрь революциясынан (1917 ж.) кейін болған азамат соғысы кезінде Солтүстік Қазақстанды патшаның гвардия әскерлерінен тазартуды ұйымдастырушылардың бірі болған. Осы ұрыстарда жасаған ерлігі үшін «Угар» деп аталасың деп партизан құрамасының командирі арқаға қағып атақ берген. Революциядан кейін жауапты қызмет істеген.

1932 жылы Угар (Мұқатай) Жәнібеков ауыр науқастан қайтыс болды.